• Firma de Proyecto Migranet en Santander Firma de Proyecto Migranet en Santander
  • O proxecto europeo Migranet, coordinado pola USC, estudará as poboacións de peixes migradores no espazo do suroeste europeo

    Pulicada: 03/02/2011

    Investigadores de Francia, Portugal e España traballarán de xeito conxunto na creación e posta en marcha dun observatorio das poboacións de peixes migradores no espazo do suroeste europeo. Será no marco do proxecto Migranet, coordinado pola USC e cofinanciado polo Programa Interreg IV B-SUDOE, con fondos FEDER da UE.
     
    As principais características deste proxecto presentáronas este mércores 2 en rolda de prensa o director da Estación de Hidrobioloxía Encoro do Con e coordinador do proxecto, Fernando Cobo, e o vicerreitor adxunto de Investigación e Innovación, Pablo Ramil. Ao acto asistiron tamén o subdirector xeral de Recursos Cinexéticos e Piscícolas da Xunta de Galicia, Emilio Rosa; o investigador do Institut National de la Recherche Agronomique (INRA), Etiene Prevost; e o presidente da dirección do Centro Interdisciplinar de Investigaçao Marinha e Ambiental (CIIMAR), João José Oliveira.
     
    O proxecto, cun orzamento total de 824.827 euros cofinanciado ao 75 por cento con cargo a fondos FEDER, estenderase ao longo dos vindeiros dous anos co obxectivo principal de contribuír á conservación e recuperación das especies de peixes migradores e do seus hábitats, a partir dun mellor coñecemento compartido da súa situación real.
     
    A posta en marcha do proxecto comezou a comezos de ano, e da un paso máis coa celebración este mesmo mércores no Colexio de San Xerome das primeiras xuntanzas das estruturas de coordinación e xestión do proxecto, o Comité Coordinador e o Científico Técnico. A seguinte fase será a posta en marcha dunha rede de control formada por varios ríos en Galicia (Umia e Ulla), Portugal (o tramo internacional do Miño) e en Francia (Nivelle).
     
    Rede de control internacional
    A rede, con indicadores comúns nos distintos países, estudará os datos relativos ás poboacións de lamprea, anguía, sáibao, saboga, salmón e a forma migradora da troita común. Co tratamento da información recadada, o proxecto prevé o establecemento de directrices conxuntas para a explotación sustentable dun recurso de gran relevancia económica e social no territorio SUDOE.
      
    A Estación de Hidrobioloxía ‘Encoro de Con’ será o centro encargado de liderar a iniciativa, na que a USC participa conxuntamente con catro socios máis distribuídos entre España, Francia e Portugal, como son a Dirección Xeral de Conservación da Natureza, a Fundación Centro de Estudos Eurorrexionais Galicia-Norte de Portugal (FCEER), o Institut National de la Recherche Agronomique e o departamento de ecofisioloxía do Centro Interdisciplinario de Investigaçao Marinha e Ambiental da Universidade de Porto. Ademais, e como entidade asociada, tamén participa o Aquamuseu do Río Minho da Cámara Municipal de Vila Nova da Cerveira, que colaborará en determinadas fases do proxecto.

     

 

Nº Visitas: 1163241